m18講場：打風大戰四方城　投推署劉凱旋遇啟示？

周日(20日)打足成日風，而「打風打牌」可以算得上香港獨特嘅社會文化之一，就連投資推廣署署長劉凱旋(Alpha Lau)都趁住颱風天，同屋企人打健康麻雀，四方城上仲得到工作啟示添！

Alpha喺社交平台發文指，颱風天唔少店舖休息，戶外活動亦受阻，打麻雀係熱門嘅居家活動之一，亦係由上一代延續下來嘅集體回憶。同時感謝喺颱風天下默默工作嘅各界人士。因為有佢哋，令到香港持續運轉，守護住香港人嘅安全同生活。

至於工作上啟示，佢只有4個字「北都發展」。咁即係咩意思？睇埋幅圖，碰咗2對牌，分別係「北」及「發」，明晒！