m18講場:史美倫最後一次主持港交所新春開市
香港交易所(00388)主席史美倫(Laura)將於4月卸任,周三(14日)最後一次港交所主席身份主持新春開市儀式,仲預告「退休啦」!刻下環境風高浪急,佢就大派「定心丸」,明言好相信香港即使喺充滿挑戰嘅情況下,都能夠打破困局,再創高峰。
Laura喺金融界打濟滾多年,同金融業界、市場參與者齊齊努力,見證住市場充分體現出香港人堅毅不屈嘅精神,而且勇於創新,並有好強嘅變通能力。同時趁機會多謝金融業界、各政府機構及港交所同事嘅信任,令佢有機會可以喺推動內地及香港市場發展出力,見證香港金融市場,由區域性市場,一步一步演變成國際金融中心。
佢指,早幾年港交所不斷加強業務多元化發展,去年港交所股票以外的交易業務,包括交易所買賣基金(ETF)、期貨、期權等成交數字,均創紀錄新高,證明咗未雨綢繆係非常重要。
雖則Laura執掌港交所6年任期即將結束,但佢又預告,港交所喺新一年,會藉着龍所象徵嘅活力、朝氣,繼續推動市場革新,邁步向前,提升市場流動性,增強香港作為國際金融中心嘅實力。同時,會繼續積極喺海外招商,吸引來自中東、東南亞、世界各地企業及投資者,參與香港市場,又會開放更多嘅新業務,而且利用科技提升其服務,為業界創造更多機會。
回顧過去,她指,本港市場由香港公司上市,到H股上市,再發展至今日、不斷擴容的互聯互通機制;並由股票為主,拓展至衍生產品、定息及貨幣產品(FIC)、大宗商品,甚至近年興起嘅碳交易、綠色金融,過去港交所在不同市場設立多個辦事處,均顯示出港交所走向世界舞台。
下任港交所主席嘅人選眾說紛紜,無論邊個上任,小記只希望佢可以帶領香港資本市場更上一層樓,股市興「龍」!