利寶閣擬改名「貓屎咖啡」！

利寶閣集團(01869)舊年賣盤畀內地「貓屎咖啡」創始人梁乃銘，並且由梁接任主席兼CEO，禮拜四(18日)晚再宣布，打算將公司名稱改做「猫(貓)屎咖啡控股有限公司」，英文叫「Kafelaku Coffee Holding Limited」。

公告話，新名稱會更加好咁反映公司嘅戰略業務計劃同未來發展方向，提供更合適嘅企業形象同身份，有利該集團未來嘅業務發展，所以符合公司同股東最佳利益。

講番轉頭，梁乃銘喺2011年創立知名品牌「貓屎咖啡」兼出任「廣州貓屎咖啡連鎖有限公司」嘅董事長，家陣仲係廣州市咖啡行業協會副會長，舊年買起利寶閣創始人陳振傑兩公婆手上34.49%嘅股份。入主之前，利寶閣已經同貓屎咖啡嗰邊簽訂一項合作協議，成立合資公司喺大陸開設貓屎咖啡連鎖店。