傳爭寵不和鬧大交 黃嘉雯趕開工唔搵宋宛穎傾
前港姐冠軍黃嘉雯同宋宛穎被爆喺台慶排舞時發生爭拗,更面左左兼零交流,有指因黃嘉雯眼紅宋宛穎得寵,加上宋宛穎當選後破例未卸任就北上拍真人騷掘金,靠做「小三校長」彈出嘅黃嘉雯,即忍唔住喺宿敵面前嘈,鬧出不和傳聞。
當事人之一嘅黃嘉雯回覆東網,否認二人不和,仲話當晚綵排氣氛好融洽,更一齊討論點幫好友慶生:「當然冇啲咁嘅事啦,我聽到都覺得好不解,當晚接近成百人在場都可以做證,邊有嘈過交?大家都想做好台慶呢個Show好努力綵排拍攝,成個氣氛都好融洽。只係之前冇合作機會唔太熟悉,當晚生日會仲一齊討論買生日蛋糕畀壽星朋友,所以點會存在面左左?」被問到有冇同宋宛穎傾番件事?黃嘉雯即表示今日(16日)要工作,避談二人有否再聯絡。
至於宋宛穎講到與黃嘉雯傳不和兼喺台慶排舞鬧交,佢否認說:「唔知點解會有咁嘅新聞,當然冇咁嘅事,完全冇嗌交、冇不和。」講到黃嘉雯眼紅她的發展:「又唔覺,因為大家有唔同嘅工作,自己都係主力做司儀為主。」