斷正!黃子韜帶旗下女藝人見媽咪 情侶裝夠搶
繼承亡父240億港元遺產的內地富二代小生黃子韜(Tao),依家貴為龍韜出品公司CEO,打造個人娛樂王國,不過佢就同旗下女藝人徐藝洋傳足幾年緋聞,雖然次次Tao都燥爆唔肯認,但同時佢都冇否認過,估唔到原來男神真係咁長情,二人密冚多時嘅戀情終於正式斷正!
近日黃子韜帶埋徐藝洋同屋企人聚餐,當中徐藝洋就多次夾餸畀黃媽媽同Tao,又同Tao啲朋友有說有笑,明顯唔係第一次咁樣見面,加上佢喺Auntie面前都仲同Tao打情罵俏,用手掌輕推老闆個頭,真係唔係普通女藝人可以同自己個Boss咁close!去到飯局尾聲,眾人散席時,二人更加以一模一樣嘅情侶裝走人,一齊上車返屋企,親密關係一睇就明晒。影片曝光後,即刻升上熱搜第一,「#黃子韜帶徐藝洋與家人聚餐#」話題喺半日就已經去到2.4億閱讀量,仲有唔少網友笑佢哋扮晒嘢,明明係公開嘅秘密都唔認「他承認女朋友會怎樣嗎,竟然還罵粉絲,真是無語」、「都快老夫老妻了,硬是不承認」。