愛犬聲帶被割身世坎坷 梁諾妍霎時任性求老公領養
洪永城(Tony)太太梁諾妍(Inez)一見到6歲大的金毛尋回愛犬Molly就會笑,談到如何相遇,她說全靠一張「定情照」:「睇到個領養Po度,Molly嗰張咬緊波波嘅相,真係一見鍾情,因為嗰陣我懷孕3、4個月,又要忙健身室嘅嘢,Tony唔想我辛苦,話遲啲先養狗,我真係差啲跪低求佢,佢先答應。」
旁人可能覺得她「任性」,但就因這份堅持,令她得到回報:「Tony成日要做嘢,得我一個喺屋企,多得Molly陪住我,我過咗最開心嘅孕期。」未知是否「胎教」關係,發現囡囡「洪寶寶」和Molly特別投緣:「囡囡會主動畀生果Molly食,但未試過請爸爸、媽媽食。」
失散母子重逢
Inez輕撫Molly的毛髮,心痛說愛犬曾靠「賣子宮」過活:「佢係繁殖場嘅狗,被迫生好多胎,搞到甩皮甩骨咁,連聲帶都畀人割埋,知道佢嘅身世,我更加愛佢。」Molly亦有報答洪家再造之恩,每周返Inez的健康室做「店長」冧客:「見佢啲學生做運動攰到趴地,就走埋去舔人,好似叫人加油咁。」
最近Inez更榮升「外婆」,Molly的囝囝「冬甩」主人千里尋親搵上門,她說:「『冬甩』媽咪透過網上搵我,話發現佢領養嗰隻狗仔嘅晶片號碼同Molly係一樣,相信佢哋係母子關係,咁都搵番,真係好神奇。」而奇迹不止一次,因Inez已尋回另外兩隻「失散」的狗BB。
場地提供:Fitnez