周奕瑋做樓市節目激發買樓欲　順手戒埋的士癮

藝人周奕瑋（Jarvis）近日夥拍鄭裕玲及鄭衍峰主持樓市節目，因有不少藝人的舊居因而曝光，故成為熱話！問到Jarvis的置業心得，他搞笑答：「其實喺買樓方面，我真係完全無知，連居屋補地價都要嘉賓呂慧儀提先記得。我一直覺得呢件事距離自己太遙遠，做完呢個節目先發現件事離自己愈嚟愈遠，因為原來以前啲樓價真係平好多，依家樓市真係一天價。」

談到藝人舊居，Javis坦言：「最難係聽到陳敏之十幾年前買咗將軍澳一個唔細嘅單位，當時只係幾百萬，依家起碼升咗一倍有多喇。仲有聽到嘟姐（鄭裕玲）喺節目分享80年代佢買嗰層樓，只係1%首期，萬幾蚊訂金就得，聽到都令人羨慕。」他又打趣主持這個節目，令他的起心肝慳家：「尤其係啱啱錄影完嘅幾個禮拜，我都坐少咗的士及買少咗無謂嘢，諗住儲多一千幾百，幫補吓第時做買樓基金都好。」