蘇皓兒被嚇窒!伍詠薇《金宵2》又瘦又醜「報仇」
「實力派」伍詠薇(伍姑娘)近日於無綫新劇《金宵大廈2》演家庭主婦,由於只是兩集單元故事,難怪伍姑娘日前接受東網專訪時,也直指唔夠喉,不諱言入行至今演過無數次母親角色,最誇張一次是演黃宗澤母親,惟二人真實年紀僅相差11年,她也毫不介介意,認為作為演員不應有包袱。
其實今次伍姑娘參與《金2》,基程度上可說是契細佬陳山聰間接撮合,她說:「記得山聰擺喜酒時見到呢套劇監製,有提過想演單元,後來佢真係搵我,仲同編審口述講個故事,已經好震撼,但2集古仔好多嘢要表達,我認為起碼8集,所以要2集去講個故事,壓力來自呢度。」
減磅營造貼地角色
談到與新一代演員蘇皓兒演母女,伍姑娘透露雙方事前不認識,故進行首次圍讀時,也感到對方緊張:「新人對住我哋都緊張,會覺得我氣場大,明白嘅,所以我主動同佢對好多戲,對得多都有用嘅。」為營造其貼地角色,伍姑娘於開拍前也特別減磅:「本身49公斤,跌到去47公斤,我一直都Keep住Under Weight,到拍嘅時候再脫水,皮膚唔上妝,嘴皮甩晒,不過我妝都唔補,同埋啲戲服肉酸到呢,真係報晒仇!不過一身造型幫到角色好多,每日穿起套戲服已經『上身』,見到個女爛面造型已經知點處理。(如果要你演爛面接受到?)我可以,有啲演員好多包袱,有啲又唔可以有小朋友,會覺得第時返唔到轉頭,但其實外國演員見劇本好乜都得啦!」
見證山聰成長
與山聰自2003年後再次合作,伍姑娘坦言雙方雖然僅得幾場對手戲,但認為可以攜手合作已感開心,更指多年來見證對方成長:「睇住佢演戲進步,亦正亦邪樣令到觀眾接受,之後轉型正氣又得,呢套劇佢好主力,所以唔得閒同我玩,不過我都會喺某啲集數度出現。」近年多主持節目的她,被問到可有劇癮?伍姑娘表示一直喜歡演戲,只是觀眾較喜歡她綜藝的一面:「佢哋話我似徐熙娣(小S),因為香港尺度有限,所以我都會樂而不淫,其實之後希望市場唔只香港,不嬲鍾意內地拍嘢,可以專心啲,又可以儲錢,唔使開工又可以Book個司機去睇風景,成件事好新鮮。」
服裝:iiJin