創業板股擬改名曾升4成 改乜名咁旺?
今日有隻異動股升咗3成,就係創業板股匯安智能(08379),至於有咩利好消息導致佢升咁多?收購?合併?業績好?統統都唔係,而係改名。
你以為呢間匯安智能搵咗邊位風水大師幫公司改名轉運啦。非也。皆因佢個新名想改做「懶豬科技集團有限公司」,「懶豬有限」喎,咪幾好聽。
根據匯安智能年報,公司上咗創業板都有3年半啦,係從事生物特徵識別裝置嘅,包括人臉識別、指紋識別同虹膜識別等產品,仲自己做埋營銷。
至於何解要改名,董事會解釋,建議更改公司名稱「將有助為公司之企業形象及身份帶來新氣象」,「將有利公司之未來發展」。公司嘅未來發展就唔清楚,不過話懶豬「有助為公司之企業形象帶來新氣象」,就未免太過新穎。
點解改個名(仲要未經股東特別大會通過批准㗎),股價會爆升?你咪理。總之佢最高升過44%,收市報0.118元,一夕間脫離「仙班」,成為毫子股。