謝霆鋒揸筷子「左右開弓」　網民驚嘆唔易學！

型男謝霆鋒最近去咗重慶開工，有「Chef Lemon」之稱嘅佢，喺當地走訪唔少餐廳，帶大家食好嘢！呢次佢就去咗一間食地道成都火鍋嘅餐廳，佢仲搵埋同佢喺電影《怒火》合作過嘅演員麥亨利嚟一齊食，佢哋食食吓仲戲癮大發，即場鬥戲添！

不過霆鋒最犀利嘅唔係食勁辣麻辣火鍋都面不改容，而係佢揸筷子嘅技術，正常人揸筷子都係用自己嘅慣用手，要夾硬用自己唔慣嘅手嚟夾餸，一定係會有難度，但係應該係用慣右手嘅佢，就算用左手夾餸都完全冇問題，仲直頭「左右開弓」拎住兩對筷子一齊打邊爐都得，令到網民都感到相當驚嘆，大讚佢揸筷子技術高超，一啲都唔容易學呀！而有唔少網民就讚霆鋒好肯去地道平民餐廳食飯，真係夠晒貼地！