洪永城娶梁諾妍 即場宣布老婆大肚:預產期12月
藝人洪永城(Tony)今日(11日)迎娶梁諾妍(Inez),二人正式拉埋天窗,更喺開心日子宣布Inez已懷孕。二人今早於尖沙咀6星級酒店行禮,正式結為夫婦,Tony人逢喜事精神爽,全程冧爆之餘,當記者追問是否將當人父,他大方承認「雙喜臨門」,問到如今是否膊頭很重?他答:「唔會,係開心嘅正能量,以後努力工作同搵奶粉錢。」二人又透露預產期是12月,即Inez已大肚約4個月,好大機會是山羊座BB。
新娘透露2月求婚後,2人開始嘗試造人,想不到很快成事,記者讚Tony「一擊即中」,Tony即露出「得戚樣」,之後先坦白6、7擊先「中」,又表示其實想做爸爸好耐,係時候組織一個家庭。當問到已爬頭、比好友黃翠如頭更快造人成功?他謂:「呢啲嘢唔係計時間嘅。(會唔會過蕭正楠兩招?)都好喎,不過有招式之餘,都要有體格,哈哈!」
為亡父斟茶感觸落淚
談到今早婚禮情況,新娘透露做足中西儀式:「我哋有着褂,亦有斟茶畀雙方父母。」由於Tony媽媽身在台灣,只能透過視像通訊「隔空」飲新抱茶,而Tony對在天上的爸爸致上敬意,Tony更忍不住感觸落淚,他表示:「我唔忍心要媽媽返嚟隔離21日,希望疫情過後,可以擺酒啦。(接新娘時你有冇喊?)全部人都有喊,我開聲就眼濕濕喇。其實TVB好多同事因限聚令,今日都請唔到,遲啲擺酒請番。」他又指今日賓客要分時段到場,每節限50人。
氣勢浩蕩接新娘
至於今日接新娘時,Tony率領C君及一眾好友兄弟團氣勢浩蕩接新娘,由新娘梁諾妍帶領的黎紀君及一眾姐妹團就要求Tony「密室逃脫」,被他大讚有心思:「搵啲數字先有鎖匙開新娘房門,搵唔到要受罰,都係啲正常嘅懲罰,都預咗畀佢哋虐待。(開門利是有幾多?)4位數,其實以後我啲錢咪又係佢(梁諾妍)。」二人又大方展示婚戒,及約1卡的訂婚戒指,而婚禮就使了6位數,Tony搞笑表示未到7位數。
至於「愛的宣言」令Tony緊張到「成晚瞓唔着」,最終唱《分分鐘需要你》冧老婆,梁諾言搞笑謂:「唱功仲有進步空間。」Tony則指自己有多謝太太「收留我呢個奇怪嘅人」,並指婚假將至9月,有充足時間照顧懷孕妻子。