【廁所求婚】洪永城宣布娶梁諾妍:你是我的福氣!
藝人洪永城(Tony)與梁諾妍(Inez)於2018年公開認愛,他們今日(10日)正式公告:「我哋要結婚啦!」一對準新人早前更秘密影結婚相,只見婚照兩人雙手緊握在一起,寓意他們手拖手,今後一起笑住過!
他們又分別在社交平台上宣布喜訊,洪永城說:「由一齊跑步、到傾電話、睇日出、拍拖、不計劃的旅行、到扮攰逃避跑步、通宵睇動漫、同居、到我們至愛Coco離世、到開工連晚安早晨都沒有機會同你講、到今日一齊攜手踏上我倆的新旅程,好在有你,緊握我手,我希望一世都有你在身旁,追到你是我的僥倖,娶到你是我的福氣!」
梁諾妍說:「下半生手拖手,繼續一起跑下去,繼續跑去世界每個角,感恩遇到你,常常帶給我歡樂,照顧我陪我通宵睇動漫睇網球比賽,工作上的互相扶持,願餘生我們也要一起笑住過,我們結婚啦!」
梁諾妍透露洪永城的求婚過程,既搞笑又感人,她笑說:「佢嘅求婚過程係好好笑,好多蝦碌嘢發生,佢喺屋企個廁所度求婚,我覺得好好笑,不過好係佢嘅style,成個過程我係笑到喊,不過都好感動,有晚佢拍完嘢返屋企,就入咗廁所一陣出嚟,跟住到我人有三急入廁所,佢又跟住我入廁所,當我打開廁所門,原來佢喺廁所度布置咗有一個攝錄機,又喺洗手盆度放咗啲微型燈泡,又有一束鮮花,鏡上又貼咗啲心形卡,仲寫上MARRY ME?我好笑又感動,我問佢點解要喺洗手間求婚?佢話知道我一定會去洗手間,最好笑係佢拎隻戒指出嚟求婚時候,我話我真係好急,你等一等我去完廁所先,結果佢要等我辦完大事再求婚,我就Say Yes!」
其實喺今年過完農曆新年後,Tony已經向Inez求咗婚,之後Tony就開始籌備他監製的電視劇,Inez就專注她健身中心搬店和拍攝節目的事。他們依家一邊忙於工作,另一邊廂籌備婚禮,婚禮會在今年內舉行,落實日子會開心share給大家。
黃翠如早知婚訊
至於身為洪永城紅顏知己的黃翠如,對於好友快做老襯,她說:「當然知道呀,說不出的感動,終於見證他長大了⋯⋯叫佢10年前爭我嗰500蚊快啲還畀我,如果唔係唔打隻金豬畀佢!」
點解廁所求婚?
洪永城接受《東張西望》訪問,則大讚女友無得頂:「有佢喺我身邊的確係一件好開心嘅事,佢係一個好正面、好正能量嘅人,就算我幾攰、幾負面同幾灰都好,佢都會喺我身邊引我笑,講啲唔好笑嘅笑話,精神上支持我,有佢陪住我,我好幸福!」
至於何解選擇廁所求婚?他說:「我想佢一推開廁所門,見到啲花、布置,點知佢真係好急,本來我想跪地,但佢話屙埋先,我就喺旁邊等,佢出嚟就再求婚,我都叫佢唔好講喇,咁烏龍嘅嘢。(幾時結婚行禮?)計劃緊,依家忙拍劇,一知道會同大家講。」